Residencias artística – Escora Danza

Residencias artísticas

Que é unha residencia artística?

É un programa que ofrece a unhe artista o espazo, o tempo e os recursos para traballar individual ou colectivamente na súa práctica artística.

Ter unha residencia artística significa ter o tempo, o espazo e os recursos para adicarlle á búsqueda artística, para experimentar e xogar co movemento, coa voz, cos obxectos, coas texturas, co texto, coas ideas…

Por que facemos residencias artísticas en ESCORA?

Por que facer residencias artísticas?

Porque a riqueza cultural, artística, paisaxística e natural da Costa da Morte é incomparable.

Porque os seus espazos, entornos e xentes, xeran un contexto óptimo no que concentrarse na creación artística e no que permitirse interactuar coa veciñanza, co territorio, coa historia e coas tradicións.

Porque a danza non é unha disciplina tan recoñecible na Costa da Morte e desexamos contribuir a normalizar a presenza da danza contemporánea neste territorio.

Residencia artística 2023

A experiencia da residencia artística en 2023

No 2023 activamos por primeira unha residencia artística no contexto de ESCORA. Isto aconteceu porque coñecimos o proxecto A Casa no Alto, dirixido polo artista visual e xestor cultural Pablo López, que no ano anterior tiña realizado diversas residencias artísticas na vila de Camelle.

Para nós tanto o contexto como as historias que nos contaba Pablo e a complicidade que pronto tivemos con el, foron indicadores claros de que tiñamos que activar unha residencia artística en Camelle. Para a nosa sorte, o Concello de Camariñas, tamén aceptou rápidamente a proposta e conseguimos artellar unha residencia artística entre o Museo Man de Camelle e a Casa no Alto.

Nesta primeira edición, a artista en residencia artística foi Alejandra Balboa, co seu proxecto Cando lle permito ao corpo aquilo que digo, que acompañada por Diego M. Buceta e Pavel Amilcar, tiveron a oportunidade de residir e traballar dúas semanas na vila de Camelle.

Tivemos a sorte de ver o resultado no contexto de ESCORA 2023, un momento no que compartir o traballo coas veciñas que tanto tiveran acompañado o proceso de Alejandra.

Sobre a residencia

Artista en residencia: Alejandra Balboa

Proxecto: Cando lle permito ao corpo aquilo que digo

Colaboran: A Casa no Alto, Mar de Fábula e Concello de Camariñas

Datas: 5 ao 17 de xuño de 2023

Espazo de traballo: Museo Man de Camelle

Espazo de residencia: A Casa no Alto

Sobre Cando lle permito ao corpo aquilo que digo

Cando lle permito ao corpo aquilo que digo é un proxecto de investigación física que explora a distancia entre a palabra e o corpo, no que me propoño esculcar e observar a garganta, a mandíbula, a boca (lingua) e a respiración como motores desde os que partir e facer florecer o movemento.

Inspirándome en técnicas xaponesas que me axudan a conectar corpo e imaxinación, apoderarme do tempo, escoitarme e expresarme desde un lugar honesto, sutil, potenciando a idea de experiencia que reside no acto de moverse.

Desde o desexo, desde un corpo “deseducado”, desde unha “fisicalidad parda”. Un corpo que se permite acceder ao encontro coa incomodidade, o pudor e a torpeza, como limiares de aproximación ao descoñecido.

Sobre Alejandra Balboa

Alejandra Balboa é unha creadora e intérprete galega, graduada pola Escola Superior de Dança de Lisboa. Desde 2016 desenvolve o seu traballo en solitario de investigación, pedagoxía e creación. A súa filosofía vira ao redor da concepción do movemento como canle de escoita individual e colectiva, como ferramenta comunicativa e expresiva do humano.

www.alejandrabalboa.com

Residencias artísticas 2024

A experiencia das residencias artísticas en 2024

Trala boa acollida da residencia artística en Camelle no 2023, decidimos volver a apostar polo mesmo formato en colaboración con A Casa no Alto, Mar de Fábula e o Concello de Camariñas. Esta vez, estivemos en diálogo co Colectivo VACAburra para que foran elas que puideran vivir a experiencia en Camelle, co seu novo espectáculo Ruar.

Durante o proceso de mapeado de ESCORA 2024, atopamos en Corcubión unha vontade especial para que a experiencia de ESCORA fose máis alá da data do evento con algunha acción que puidera trascender e deixar unha pegada máis concreta no territorio. Deste xeito coñecimos non só os espazos municipais cos que conta o concello, senón tamén o intenso tecido sociocultural do lugar. Finalmente, en diálogo co Concello de Corcubión, tomamos a decisión de activar unha segunda residencia artística co artista Félix Fernández en Corcubión, entre o Centro de día e a Nave de Protección Civil do Porto co seu proxecto Xavier a través de min.

Deste xeito, o programa de ESCORA 2024 inclúe dúas residencias artísticas, coas súas correspondentes mostras dos traballos en proceso. É un orgullo para nós continuar afianzando as relacións territorio-artista e artista-territorio, facendo por unha banda que a danza contemporánea teña cada vez máis pegada na Costa da Morte, a un tempo que podemos acoller novos proxectos de danza e artes do movemento de artistas galegas.